‘A canzone d’ ‘a fatica

  •     ‘A CANZONE D’ ‘A FATICA (Raffaele Viviani 1928)

Staje ‘mbracato ‘ncopp’a ll’anneto.
– Scenne ‘o vi’! na caurara.
– Pronta ‘a càvece! Piglia ‘a cucchiara!
Jammo,’e pprete! –
E s’accummencia a fatica’.

– Saglie ‘o vi’! Guagliù, sbrigàmmoce
ca ‘a jurnata se ne va.
Tira ‘ncoppa! Guè, spicciàmmoce:
stu balcone, pe’ stasera, se ha da fa’.

‘A scala! ‘O cato ‘e ll’acqua!
Chi va svelto, nun se stracqua!
Dduie cuòfene ‘e mattune
‘ncopp”e spalle ‘e sti guagliune!

‘A càvece! doie prete!
Votta ‘e mmane! ha perzo ‘e ddete!
Cummuoglie sti parete
e ‘o balcone è fatto già.
Fravecammo ‘a casa ô prossimo,
sulo ‘a nosta sta ‘mprugetto:
‘o ‘ngigniere contr’a ll’architetto
pecchè ‘appardo nun se sape a chi ‘hann”a da’.

Leva mano! Chi se côpera?
‘E mattune? hann’ ‘arriva’.
Maie pe’ nuje sta mano d’opera
s’è pututa, pe’ na vota, autilizza’!

E arronza sti cucchiare,
sti sciamarre e ‘e ccaurare;
si no perdimmo ‘o trammo:
n’ora e mmeza ‘ncopp”e ggamme.

E cu ‘o cappiello a’ sgherra
cu ‘a salute nun m’attierre.
Vicino ô palo ‘e fierro
ce ‘a sapimmo dichiara’