‘A legge


                (Alle guardie)
 
                Mm’ammanettate ccá? Che mme ne ‘mporta?
                Chist’è ‘o duvere vuosto: ccá stongh’i’…
                Nun mme ne pento…Ll’aggi’accisa…è morta?
                Chesta commedia êv”a ferní accussí…
 
                Fa chiagnere vedennola ccá ‘nterra,
                accussí bella e tanto malamente…
                Nèh, dint’a niente mme disprezza, va a spusá…
                se scorda e me…
                e i’ ch’ero, marisciá’?
                Na cosa ‘e niente?!
 
                                                             II
 
                (Ai carcerieri)
 
                Ce ‘o vvoglio rinfacciá mo ch’è fernuto:
                stu tradimento nun ll’avev”a fá…
                Io carcerato…essa ‘int”o tavuto,
                mamma ca chiagne e nun mme pò salvá!
 
                “Ma piéntete na vota – lle dicevo –
                pecché mm”o ffaje, pecché mme miette ‘ncroce?
                ‘Sta vocca doce no, nun vasa sulo a me,
                ‘nfama ca si'”
                Che ‘nfama brigadié’,
                mm’ha miso ‘ncroce!
 
                                                            III
                (Ai giudici)
 
                Cu ‘a veste ‘e sposa è ghiuta dint”a cchiesa
                e,’nnanze a Dio, a n’ato ha ditto: Sí
                E’ stato pe’ leggittima difesa
                ca ll’aggi’accisa…o essa, o murev’i’!
                  Tu, giudice,
                mm’accuse e mme cundanne…
                ma tu, accussí, nun rappresiente ‘a legge!
                Gente cchiù peggia ll’hê mannata a libertá…
                pènzace tu!…
                Tu â casa mm’hê ‘a manná
                si ‘a legge è legge!