Ammore canta

Sole d’abbrile, scétate!…
                        Giá tutt”e stelle mòrono…
                                     Scétate!…
                 Famm”e ffeneste ‘e Napule arapí…
                        Chien”e suspire è ll’aria:
                         tutte suspire ‘e femmene
             ca, ‘mbracci’a me, stanotte, ‘int”o silenzio,
                scurnose e belle, mm’hanno ditto sí…
 
                                Pe’ chi canto?
                                    E chi só’?
 
                              Canto! Canto pe’ Napule!
                         Canto: mme chiammo: “Ammore”
                              Canto e mme trèmmano,
                                 cchiù ardente e doce,
                         ‘e core ‘e tutt”o munno ‘int’a stu core…
                         ‘E vvoce ‘e tutt”o munno ‘int’a ‘sta voce…
II
 
                         ‘O sole sponta…scétate
                          cu ‘sta canzone, oje Napule!
                                    Scétate!
                 Chi è ‘nnammurato, nun ha da durmí!
                          Tutt”e ccampane sonano…
                          Tutt”e ffeneste lùceno…
             Faccelle ‘e suonno, ‘mmiez’ê rrose e a ll’èllera,
                 s’affacciano, ‘ncantate, pe’ sentí…
 
                                Pe’ chi canto?
                                   E chi só’?
Canto! Canto pe’ Napule!
                         Canto: mme chiammo: “Ammore”
                               Canto e mme trèmmano,
                                 cchiù ardente e doce,
                      ‘e core ‘e tutt”o munno ‘int’a stu core…
                      ‘E vvoce ‘e tutt”o munno ‘int’a ‘sta voce…