Canzona bella

Vuje ca d”e bbelle la cchiù bella site,
          veniteve a affacciá for”o balcone…
          scetáteve nu poco, nun durmite:
          sentite quant’è doce ‘sta canzone.
 
                  Chesta canzone ca io stó’ cantanno,
                  è tutta sentimento e ‘spressione
                  che vène da nu core ‘e passione…
                  stu core ca, pe’ vuje, soffre ‘a n’anno!
 
          Vurria addeventá chistu cuscino,
          addó’ ‘sta faccia ‘e rose vuje appujate…
          Sul’accussí ve venarría vicino
          e vasarría sti ttrezze avvellutate.
 
                  Bella, ca d”e bellizze ca tenite,
                  facite ‘mmiria a ‘e stelle ‘e ‘mmiez’ô cielo
                  P”o scuorno, ‘a luna giá s’ha miso ‘o velo
                  pecché cchiù bella d’essa vuje parite.
 
          Tutte sti rrose ‘e for’a ‘sta fenesta,
          aspettano ca forse v’affacciate…
          Ve stanno priparanno giá na festa
          pe’ quanno vuje, da ‘o suonno, ve scetate!
 
                        E si stu suonno, a vuje, ve dá arricietto,
                        pe’ me, ‘o suonno, nun esiste maje…
                        Mme diceno ‘e llenzole ‘e dint”o lietto:
 
                        “Si vène nénna toja, durmarraje!…”