Consiglio a ‘na figliola

Dimme dimme, Nennella mia bella,
pecchè staje affacciata, pecchè?
Se potesse, mia bella Nennella,
sto pecchè se potesse sapè?..
Forze spiere ca lo cavaliero
che te guarda te voglia sposà?…
Larallà, larallà, larallero!
Chisto è suonno, non l’hai da sperà…
Larallà, larallà, larallero la la.
Chisto è suonno, non l’hai da sperà!

Si l’amico mo passa e ripassa
e te vò tutte ll’ore vedè,
sai ched’è? Chillo llà te ripassa
e se vole spassare co’ tte!
Vota vico, guè cagna pensiero
si te cride a li stelle arrivà.
Larallà, larallà, larallero!
Senza l’oste lo cunto vuò fa!
Larallà, larallà, larallero la la.
Senza l’oste lo cunto vuò fa!

Siente a me! Chilli llà sò signore:
si le rose te fanno addurà,
statte attiento! Sò spine e no sciure:
li figliole le sanno mballà.
Tu vuò fare la sposa addavero,
vuò nu core? Te votate accà.
Larallà, larallà, larallero!
Priesto priesto te voglio sposà!
Larallà, larallà, larallero la la.
Priesto priesto te voglio sposà!