Core ‘e sapunariello

Me vengo stu quadriello sapunarie’,
quanno me daje?
Quante ne vuo?
Quante ne vuo’ dimmelle signurine’?
Ca tanto ‘o saje , che vuo’ te do’.
E quasi tutt’e juorne
sapunariello passava a lla’
e quase tutt’e juorne, na cusarella
s’av’accatta’da sta signurenella d’o quartiere
ch’era perdute a poco ‘e genitori.
Sapunariello che ogni matina
cu o sacco ‘ncuollo passave a cca’
te ‘ntalliave si a signurina
nun s’affacciava pe te chiamma’.
Tu te credive e fa n’opera bbona
le dive ‘o pane e tu stive diuno,
ma senza nu pecchè, pensave ‘ncapa a te
e fa ‘na bona azione, sapunarie’.
Nu juorno t’arricuorde, sapunarie’,
tu diciste ma comme va
ca nun te vinne niente signurine’,
ma capiste ‘a nuvità
quanno essa rispunnette
nun tengo niente, comme aggia fa?
e niente le dicette sultanto a me
te puo’ accatta’, e la’ pe lla’
tu te sentiste male,
e te mettiste a chiagnere p’e scale.
Sapunariello che ogni matina
cu o sacco ‘ncuollo passave a cca’
a chillu juorne sta signurina
nun s’affacciava pe te chiamma’.
E se facette veste e scarpe nove,
e na tuletta o juorne essa cagnava
pero’ pensava a te, chiagneva e ssaje pecchè?
passavi e dive a voce, sapunarie’.
Che sape fa ‘a miseria, sapunarie’,
pure a cchiu’ onesta se po’ cagna’,
pure sta signurina nce po’ cade’
‘a vita è chesta , che nce vuo’ fa?
Pecchè nun ‘a capiste quanno dicette
me vuo’ accatta’, si tu, tu
che a perdiste, chella diceva
me vuo’ salva’?
Pensaste nun so degno e ‘na signora
sapunariello che a chella matina
nun te putive capacità
ma aspettave sta signurina
comme a na vota pe te chiamma’,
Mo’ è rimasta sola e abbandunata
senza nisciuno, povera e malata
tu le diciste oi ne’
cca nce sto io pe te
e te cadette ‘mbraccia, sapunarie’