Fresca sposa

  •     FRESCA SPOSA (F. Fiore – Ciaravolo 1937)


Dint’a ‘sta casarella a Margellina,
                  ce só’ trasuta appena mmaretata:
                  mme sceta nu pianino ogne matina…
                  mm’addorme na chitarra ‘int”a nuttata…
                  E ninno mio, ch’è ‘o primmo cantatore,
                  vò’ sentere ‘e ccanzone pure ‘a me…
 
                  ‘E vvote, ‘a dint”o suonno,
                  mme sceta e aggi”a cantá…
                  si no stu chiappo ‘e ‘mpiso,
                  nun mme fa arrepusá…
                  E che duette, oje má’, che paraviso…
                  fernimmo ogne canzone cu nu vaso!
 
                                                              II
 
                  Nun só’ tre mise ca nce só’ trasuta
                  dint’a ‘sta casa fresca fravecata…
                  e giá…che saccio, o ‘a vesta s’è astrignuta,
                  oppure chesta vita s’è allargata…
                  Stu ‘mpiso ‘e ninno mio, matina e sera,
                  che sta facenno p’essere papá…
 
                  ‘E vvote, ‘a dint”o suonno,
                  mme sceta e aggi”a cantá…
                  si no stu chiappo ‘e ‘mpiso
                  nun mme fa arrepusá…
                  e che canzone, oje má’, che paraviso!
                  Mme sento ‘e saglí ‘ncielo cu nu vaso….

 
 
                                                             III
 
                  Io tengo giá ‘o canisto appriparato
                  cu ‘e ffasce, ‘e savanielle e tanta cose…
                  ma appena vène ‘o juorno suspirato
                  nce sfrónno, ‘int”o canisto, tanta rose…
                  Chist’angelo ca vène â casa mia,
                  voglio ch’addora ‘e rose ‘mbracci’a me…
 
                  Che fa si notte e ghiuorno
                  nun mme fa cchiù durmí?!
                  Si chesto ha fatto mamma,
                  chesto faccio pur’i’!…
                  E che gran cosa, nèh, quanno mme chiamma…
                  quanno chiamma: “Mammá…” che bellu nomme!…
 
 
                  Finale:
 
                  E quanno ‘o sposo mio
                  vò’ sentere ‘e cantá,
                  lle canto ‘a canzuncella
                  p”o fá cchiù cunzulá…
                  chella che dice: “E nonna, nunnarella…
                  ‘o lupo s’ha magnato ‘a pecurella…”