Lo paparacianno

Ll’autriere, a Piedegrotta, io mme portaje,
                oje no canillo ch’era bello assaje:
                Tutte appriesso lle vanno…
                Oh, quant’è bello ‘o Paperascianno!…
                Lo Paperascianno mio,
                lo dóngo a chi vogl’io…

                Dint’a la villa, a Chiaja, a Margellina,
                mme dice la modista e la damina:
                “E’ un cagnolin brittanno…”
                Oh, quant’è bello ‘o Paperascianno!…
                Lo Paperascianno mio,
                lo dóngo a chi vogl’io…

                Io ‘sto canillo addeventá vorría,
                vicino a le cchiù belle mme starría…
                Quanto vale non sanno…
                oh, quant’è bello ‘o Paperascianno!…
                Lo Paperascianno mio,
                lo dóngo a chi vogl’io…

                Quanno Lisa lo vede io, chiano chiano,
                co’ ll’uocchie fá mme la vorría de mano…
                Lle venga no malanno!
                Oh, quant’è bello ‘o Paperascianno!…
                Lo Paperascianno mio,
                lo dóngo a chi vogl’io…

                Ma Nina ch’è cchiù furba e maleziosa,
                p’averlo mme fa sempe la vezzosa…
                Non ll’hanno…no, non ll’hanno…
                Oh, quant’è bello ‘o Paperascianno!…
                Lo Paperascianno mio,
                lo dóngo a chi vogl’io…

                Nc’è no sciore, na stella de lo cielo,
                che se nasconne ‘ncasa, o co’ lo velo…
                Mo vène, io non mme ‘nganno!…
                Oh, quant’è bello ‘o Paperascianno!…
                Lo Paperascianno mio,
                lo dóngo a chi vogl’io…