Napule ca nun more

  •     NAPULE CA NUN MORE (Manlio – Buonavolontà)


Oje furastèra ca t’abbracce Napule,
                 cu na guardata sola…
                 E vaje truvanno, da stu cielo splendido,
                 na voce ca cunzola…
                 ‘Sta voce ca te piglia ogne mumento,
                 nun só’ chitarre e nun só’ manduline…
                 è ‘o sole, ll’aria…ca, pe’ dó’ cammine,
                 è tutta na canzone attuorno a te!
 
                 E’ na musica, ‘a gente ‘e stu paese!…
                 E’ na musica ca saglie ‘mparaviso…
                 e saglie pallida,
                 scurnosa ‘e dicere:
                 “Voglio cantá!…”
                 Po’ appassa ‘e nnuvole,
                 po’ sbarca a ll’estero
                 pe’ dí: “Stó’ ccá!…”
 
                 Chisto è Napule,
                 paese ca nun more…
                 ch’arrassumiglia â femmena:
                 ammore e tuósseco
                 ce sape dá!
 
                                                             II
                 Oje furastèra che mm’hê visto chiagnere
                 na lácrema d’ammore…
                 ‘A gioja ca dint’a ll’uocchie mme puó’ lèggere,
                 ‘a tengo dint”o core!
                 Tu vuó’ sapé ched è ‘sta voce amante,
                 ca, ‘e notte, ce avvicina puntualmente?
                 E’ smania, è desiderio ‘e vócche ardente
                 ca ce ‘ncatena…e nun ce lassa cchiù!…
 
                 E’ na musica, ‘a gente ‘e stu paese…
                 E’ na musica ca saglie ‘mparaviso!
                 Che bell’interprete
                 ch’è stu Pusilleco
                 d”e ssere ‘está!…
                 Doje vócche estranee,
                 nun só’ cchiù estranee,
                 si stanno ccá!
 
                 Chisto è Napule,
                 paese ca nun more…
                 ch’arrassumiglia â femmena:
                 ammore e tuósseco
                 ce sape dá!
 

Lascia un commento

Il tuo indirizzo email non sarà pubblicato. I campi obbligatori sono contrassegnati *