‘O cacciavino

Quanno vengo ccà p’ ‘o vino
aggio ‘ncapa na mazzata.
Pe’ sagli’ sta rariata
ce vo’ apprimma na custata:
si no rieste a mità strata
senza ‘o sfizio ‘e ce arriva’.
Menu male ca lle porto
nun già vino, na mistura:
d’ ‘e varrile ‘a sciacquatura,
d’ ‘e butteglie ‘a sculatura,
n’acqua sporca adderittura
ca chi assaggia ha da sputa’.
Pe’ ffa’ ‘o mestiere
d’ ‘o canteniere
t’ê ‘a sape’ arrangia’.
Miezu quintino
duje litre ‘e vino
l’hê ‘a fa’ addeventa’.
L’acqua ‘e Serino
sempe vicino
pe’ pute’ allunga’.
‘O canteniere
ha da sape’ ‘o mestiere
pe’ pute’ arrubba’.
Ce sta ‘a serva d’ ‘o signore
ch’è nu piezzo sopraffino.
Vede a mme e se sta vicino:
io lle faccio ‘o surdiglino.
Me ‘mbriaca cchiù d’ ‘o vino:
nun riesco a ‘mbuttiglia’.
Facc’i’ tutt’ ‘o vino ‘nterra:
essa ride e piglia ‘a pezza.
Po’ s’acala e io cu sverdezza,
‘mpaparato p’ ‘a priezza,
do’ l’assardo a sta furtezza
cu ‘o pretesto d’annetta’.
Pe ffa’ ‘o mestiere
d’ ‘o canteniere
t’hê ‘a sape’ arrangia’.
Si vuo’ fa’ ‘o ‘mpicchio
spila ‘o cavicchio
pe’ te da’ da fa’.
Quanno ‘a cliente
te tene mente
nun l’hê ‘a fa’ aspetta’.
Si’ ‘o preferito:
si se rompe ‘o vvrito
nun t’ ‘o ffa’ pava’.