Figliole d’Antignano, bona gè’… ‘o cunto ‘e Mariarosa è chistu ccá: Si have ragione e dámmole ragione, e si have tuorto…e dámmole ragione… ca sempe have ragione chi vò’ bene…… Sole d’austo, nèh! Sole d’austo, nèh!
Dicette ‘a mamma: ” Figlia, arrassusía, attienta a te mo ch’è venuta Está: ‘o sole coce e ‘ncapa puó’ pigliá na malatia! Va’ pe’ sotto ‘e ffresche frasche, chisto è ‘o ‘mbrello e ‘o sciosciamosche… nun te sperdere ‘int”o bosco, taglia ll’erba e torna ccá.”
Bona gè’, sentite appriesso ‘o fatto comme va, comme va, comme va…
II
Figliole d’Antignano, bona gè’… ‘o cunto ‘e Mariarosa è chistu ccá: Sunava giá p”a via quacche zampogna, sfrunnate erano ll’arbere ‘ncampagna, friddo ‘a matina ca spaccava ll’ogne… Natale e neve, nèh! Natale e neve, nèh!
Dicette ‘a mamma: “Figlia, arrassusìa Attienta a te ca friddo e gelo fa… cummògliate si no ce puó’ appezzá na purmunía! Miettatélla, tutt”e ssere, na pettiglia a carne annura… ‘nfacci”ô ffuoco d”o vrasiere sotto e ‘ncoppa t’hê ‘a scarfá…”
Bona gè’… sentite appriesso ‘o fatto comme va, comme va, comme va…
III
Figliole d’ Antignano, bona gè’… ‘o cunto ‘e Mariarosa è chistu ccá: Dicette ‘a mamma: “Guárdate ‘int”o specchio, che só’ sti duje canale sott’a ll’uocchie?… che scuorno hê dato a me, povera vecchia!” Abbrile, abbrile, oje má’… Abbrile, abbrile, oje má’…
Diciste: “Attient’ô sole figlia mia ca ‘o sole pò fá male ‘int’a ll’está’ e attienta a te quann’è Natale e fa friddo p”a via… Ma pecché po’, a Primmavera, nun diciste a chistu core: Statte attiento pe’ ll’ammore ca, d’abbrile, attuorno va?..”
Bona gè’, ‘o fatto ‘e Mariarosa è chistu ccá… chistu ccá, chistu ccá…
