Primma siconda e terza


                 ‘A primma vota ca t’aggio ‘ncuntrata
                 è stato dint”o trammo d”a Turretta:
                 Tu proprio ‘e faccia a me stive assettata…
                 io, mm’avevo ‘ncignata na paglietta…
 
                        Tu mme guardaste…
                         Io te guardaje…
                        Tu suspiraste…
                         Io suspiraje…
                         Scenniste…
                         Scennètte…
                         Sagliste…
                         Sagliètte…
 
                 Cosí, dopo nemmeno mezz’oretta,
                 benedicette, ‘o trammo d”a Turretta!
 
                                                                 II
 
                 Po’, n’ata vota ca t’aggio ‘ncuntrata,
                 è stato verso ‘e qquatto, ô Chiatamone:
                 Stavi elegante, tutta intolettata…
                 Diciste: “Me l’offrite nu spumone?”
 
                        – Troppo onorato… –
                           E te ‘mmuccaste.
                        – Mm”o piglio n’ato?.. –
                           E t”o pigliaste…
                           Asciste…
                           Ascètte…
                           Sagliste…
                           Sagliètte…
 
                 Doppo tre ore, ascètte da ‘o purtone,
                 benedicenno ‘a strada ô Chiatamone.

 
 
 
                                                                III
 
                 ‘A terza vota ca t’aggio ‘ncuntrata,
                 è stato dint”a Chiesa ô Viscuvato…
                 Vicino a me tu stive addenucchiata…
                 Io stevo proprio brutto cumbinato.
 
                        Dicette il prete:
                        Sposatum est!
                        Fra me pensai:
                        ‘Nguajatum est!…
                        Asciste…
                        Ascètte…
                        Sagliste…
                        Sagliètte…
 
                 Ma ‘o jorno appriesso, nèh che fa? Mme lassa!
                 E se ne fuje cu tutt”o fondo ‘e cassa!
 
                 Finale:
 
                        Mo só’ zitello
                        e maritato…
                        Senza mugliera
                        e disperato…
                        Stó’ ghiènno…
                        Venènno…
                        Sagliènno…
                        Scennènno…
 
                 Ce refunnètte pure duje spumone!
                 Mannaggia ‘o trammo, Turretta e Chiatamone!