Sciuldezza bella


Bella figliola ch’hê ‘ngannato a tante,
          chi sa si ‘e tradimente ll’hê cuntate!
          Ma si t’affacce, ‘e vvide a tuttuquante:
          simmo ‘a quarantaquatto ‘nnammurate!
 
              ‘Ammore è doce e ‘o spassatiempo è bello…
              ll’arape ‘sta fenesta o nun ll’arape?…
              Chist’è ‘o mumento pe’ chiammá ll’appello:
              affácciate nu poco e conta ‘e ccape…
 
          Che finezza ‘e cuncertino!…
          ma è n’orchestra o na fanfarra?
          Peppe gratta ‘o mandulino,
          Tóre pízzeca ‘a chitarra…
              Giorgio sona ‘a ciaramella,
              Papiluccio, ‘o putipù…
              Picceré’, sciuldezza bella!…
              Sulo chesto saje fá tu!
 
                                                          II
 
          Bella figliola ch’hê ‘ngannato a tante,
          tenive ‘nfrisco tutte sti partite…
          Mo ‘e vvide ca te sfilano pe’ ‘nnante…
          ma ‘o tiempo passa…e tu nun te mmarite!
 
              Nun ce sta core ca nun hê traduto;
              nun ce sta vocca ca nun hê vasato,
              ma nun fa niente, va’!…chi ha avuto ha avuto!…
              tutto s’acconcia cu na serenata…
 
          Picceré’, stu cuncertino
          porta overo ‘e cape suone,
          Bebé canta, e Vicenzino
          mette ‘a terza da ‘o puntone…
              Giorgio sona ‘a ciaramella…
              Papiluccio, ‘o putipù…
              Picceré’, sciuldezza bella!
              Sulo chesto pienze tu!

 
 
                                                         III
 
          Bella figliola ca staje ‘nchiusa ‘a dinto,
          vulessemo sapé cu chi staje ‘nchiusa…
          fall’affacciá…ll’avimm”a fá cunvinto
          ca tu nu juorne ‘o ‘nchiante cu na scusa…
 
              Tu si’ na scellerata e ‘o tradimento,
              cresce cu ‘e vase ca ve date ô scuro…
              Dille ca se ‘mparasse nu strumento:
              ll’ha da suná cu nuje ll’anno venturo…
 
          Picceré’, pe’ tutt”o vico,
          vanno ‘e nnote ‘e ‘sta canzone…
          si vedisse ‘on Federico
          ll’urganetto comm”o sona!
              Giorgio sona ‘a ciaramella…
              Papiluccio, ‘o putipù…
              Picceré’, sciuldezza bella!
              Sulo chesto saje fá tu!