Sott’ ‘e ccancelle

(Dall’interno)
 
          “Oje figlie ‘e mamma,
          ca nu destino niro ha cundannate,
          dint”e ccancelle site tutte frate!”
 
 
                                                           I
 
          – Sí, mme ne vaco…v’ubbidisco…’o ssaccio…
          sott”e ccancelle nun se pò cantá…
          ma v’assicuro, niente ‘e male faccio,
          ll’urdema vota ‘o voglio salutá
 
               Nu preputente, ‘e me abusá vuleva
               Isso ll’acciso ca mm’apparteneva…-
 
          (S’ode uno strepitío prodotto dal legno
          contro il ferro; è la regolamentare
          visita notturna).
 
          “Oje secundino
          ca staje passanno ‘a visita, dincello
          ca stó’ ccá sotto, a stu carceratiello!”
 
                                                          II
 
          Da ‘a casa soja ‘a mamma mm’ha cacciato…
          cchiù nun mme vo’ ‘a famiglia mia vedé…
          E sola i’ mo, cu ‘a croce ‘e nu peccato,
          chisá a qua’ parte putarría cadé!
 
               Ma nun mme coglie, no, ‘sta mala sciorte…
               Pecché…pecché io corro ‘mbracci’â morte!
 
          “Che notte fredda!
          Carceratiello…e tu dint’a stu lietto
          nun truvarraje calore, né arricietto…”

 
 
                                                         III
 
          Addio, addio! E’ ll’urdemo saluto
          ca Dio, pe’ grazia, t’ha da fá arrivá…
          Cunfòrtate a saperme ‘int”o tavuto
          ca viva dint”o fango a ‘nfracetá.
 
               E prejo a vuje ca nu sullievo ‘o date,
               cumpagne d”a sfurtuna, oje carcerate!
 
          “Tu mme vuó’ bene…
          E pe’ stu bbene io voglio campá ancora…
          Giustizia i’ cerco…e ha da vení chell’ora!”
 
 
          (Nel mentre la musica esegue, a solo, il motivo
          dello stornello, l’artista dimostra di lottare
          fra due dei suoi intimi propositi: Quello di
          troncare i propri giorni e quello di vivere;
          prevalendo questo, lancia l’arma lontano).