Malavicina

Malavicina mia, malavicina…
          e tutt”e juorne è ‘a solita canzone…
 
          Acqua lle scorre dint’a chesti vvéne!…
          Comme tu, ammore, mm’hê attaccato ‘e mmane?!…
          Io faccio finta ca nun mme n’addono
          ma, ‘mpont”o musso, ce teng”o vveleno…
 
                  E mille só’ ‘e dispiette
                  ca pienze e ca mme faje
                  e, sott’a ll’uocchie mieje,
                  mme ll’aggi”a suppurtá!
 
          Malavicina mia, malavicina…
          dint’a stu vico nun ce stó’ cchiù buono…
          Cchiù malamente ‘e te,
          cchiù dispettosa ‘e te,
          nun c’è nisciuna…
          Nun c’è nisciuna!…
 
          Malavicina mia, malavicina…
 
                                                    II
 
          Quanta ‘nnammuratielle tiene appriesso,
          mm”e ppasse, a uno a uno, sott”o musso…
          Tu aspiette ca facesse quacche mossa,
          ma io tengo a mamma ca mme spezza ‘e passe…
 
                  Mme dice: “Figlio, jésce
                  e torna â casa ‘e notte…
                  E’ meglio ca, ‘e rimpetto,
                  tu nun ‘a vide cchiù…”
 
          Malavicina mia, malavicina…
          dint’a stu vico nun ce stó’ cchiù buono…
          Cchiù malamente ‘e te,
          cchiù dispettosa ‘e te,
          nun c’è nisciuna…
          Nun c’è nisciuna!…
 
          Malavicina mia, malavicina…