Povero guappo

Páccare amare e rasulate ‘nfaccia:
         chist’è ll’ammore ‘e vasci’â Sanitá.
         Tu nun si’ ‘o tipo ca mme cade ‘mbraccia
                 si nun te faccio
         chello ca maje t’aggio vuluto fá…
                     E pure ca te faccio a tanto ‘o piezzo,
                     tengo ‘o certificato ca só’ pazzo…
 
                 Fronn”e viola,
         mm’aggio fatto affilá pure ‘o rasulo
         e nun te dico cchiù meza parola…
                  Sciore ‘e granato,
         i’ tanno stó’ buonissimo in salute,
         quanno stó’ duje o tre anne carcerato!
 
                                                         II
         Uommene guappe ‘e stu quartiere mio,
         ve voglio tuttuquante contr’a me;
         ‘o guappo, ‘mmiez’ê guappe, só’ sul’io,
                 só’ carne ‘e guaje:
         ‘mmiez’ê malevivente songo ‘o rre.
                     Stanotte porto ‘e suone ‘mpunt’a ll’una…
                     sbattite ‘e mmane pure quanno stòno…
 
                 Fronn”e murtella,
         i’ voglio dá tremila feste ‘e ballo
         si ‘a ‘nnammurata mia more zetèlla…
                 Fronn”e limone,
         io ‘a giudico na meza culumbrina
         ca pe’ me sulo more ‘e passione…
 
                                                        III
        Vuje ca facite ll’opere ‘e triato,
        quanno ‘e screvite ‘e dramme ‘ncuollo a me?
        Mettítece nu guappo sfurtunato,
                 miezo ‘mpazzuto…
        ca chiagne zitto e nun se fa vedé!…
                    Facitece trasí sempe pe’ dinto,
                    na mamma vecchia vecchia e cummuventa!…
 
                 Giglio sfrunnato,
        ‘o juorno ca mme veco cchiù abbeluto,
        mme piglio seje pastiglie ‘e sublimato…
                 Sciore appassuto,
        more, cu me, na vecchia scunzulata:
        pe’ tutt’e duje nce abbasta unu tavuto!