‘A befana ‘e Peppeniello

‘A befana po paese
dint ‘a notte chiena ‘e stelle
cu’ ‘nu sacco ‘ncopp’ ‘e spalle
va purtanno ‘e pazzielle,

va p”a casa ‘e Francischella
che è malata e puvurella
o stu’ sacco de pazzielle
nun ce sta niente cchiù
nun ce sta niente cchiù.

A matina int’ ‘o paese
tammurrielle e trumbettelle
zompa ‘a rilla e palummella
‘sti nennill’ a pazzià,
sulamente Peppeniello
guarda aret’ ‘a fenestella,

stregne ‘e mmane a cacciuttella
che befana è chesta ccà
e guarda ‘o cielo blu
e guarda ‘o cielo blu.

Tutt’ nir’ int’ ‘o mantiello
passa ‘a mort’ ‘ncarruzzella
guarda a rint’ ‘a fenestella
và truvanne a Francischella,

zittu zittu Peppeniello
‘ncap’ ‘o liett’ ‘e mammarella
stà guardann’ ‘a madunnella
niente ce stà pe’ mme
niente ce stà pe’ mme.

Dic’ ‘a morte scapuzzianno
mentre guard’ ‘sta faccella
‘a befana a vot’ ‘e spalle
e sta mano addà bussà
campa campa mammarella
e ‘a befana ‘e Peppeniello,

s’arravoglia int’ ‘o mantiello
chiude ll’uocchie e se ne va,
mo duorme Peppeniè
mamma ce sta pe’ tte.

Campa campa mammarella
e a befana ‘e Peppeniello,
s’arravoglia int’ ‘o mantiello
chiude ll’uocchie e se ne va,

e cunuscite a chi
stù cunto stà a sentì.