Canta pe’ me

Canta pe’ me, stanotte, na canzone,
                tu ca si’ bella e tiene ‘a voce d’oro…
                Cantammélla stanotte, ca si moro,
                moro sentenno na bella canzone…
 
                Canta na serenata ‘e marenare…
                ch”a tantu tiempo nun se canta cchiù…
                Mare!…Stanotte, quanta varche a mare…
                ma tu nun cante? Ma a che pienze tu?
 
                                                          II
 
                Canta: ca i’ t’accumpagno cu ‘a chitarra,
                chisà, stanotte, nun se sceta ‘ammore,
                ll’ammore sfurtunato e cantatore
                ca niente vò’: nu core e na chitarra…
 
                Canta, ca è bella Napule addurmuta,
                cònnola d’oro pe’ chi vò’ sunná…
                Ma tu che pienze sulitaria e muta?
                Ma tu ch’aspiette ca nun vuó’ cantá?
 
                                                          III
 
                E pecché chiagne si ‘a nuttata è bella,
                e si’ figliola, e tiene ‘a voce d’oro?
                Canta pe’ me, pe’ me ca mme ne moro…
                moro sentenno na canzone bella…
 
                Canta, luntana mia, ca si’ turnata
                ca si’ turnata e nun te ne puó’ ghí…
                Canta, pecché te tengo ‘ncatenata,
                pecché tu sola mm’hê ‘a vedé murí!…