Canzone ‘e sotto ‘o carcere

Ferdina’, fa’ azzitta’ ‘o cannarone
e rifliette ‘a canzone.
Grazziella sta ccà,

pe’ te di’ ca t’ha miso ‘avvucato
e ca ‘o muorto ha parlato
‘o momento e spira’ ;

ma però nun ha ditto chi è stato.
Si si’ ‘nterrugato, te saie regula’.

Certo, ‘a causa, ‘o vintotto se fa;
sta sicuro, sacc’i’ addò aggi”a i’.
Pure ll’uocchie me voglio leva’
pe’ vede’ ‘e te fa’ meno suffri’.

‘A dimane ricive ‘o mmagna’:
sorde, ‘a posta; e po’ vide ‘e fa’ asci’
tutt’ ‘a rrobba ca s’ha da lava’,
ca io t’ ‘o llavo e t’ ‘o ffaccio trasi’.

Statte buono, nient’ato aggi’ ‘a di’.
Ciento vase pe’ dint’ ‘o ccanta’!
Chistu tiempo che avimm ”a suffri’
rassignate, ‘o facimmo vula’.

Nun fidarte, te ponno tradi’;
e ‘a cundotta: n’esempio ‘e buntà.