Guappo no

  •     GUAPPO NO (Fiore – Tagliaferri 1918)


Guappo? No! Nun sóngo guappo…
                ma si stóngo fatto a vino,
                quacche sera ca t’acchiappo,
                faccio overo ‘o malandrino.
 
                E te dico: “Ccá stóngo i’,
                si pe’ st’uocchie aggi”a murí,
                si pe’ te mm’aggi”a danná,
                figlia mia, t”o ppuó’ scurdá…
 
                        Io só’ giovane e só’ forte
                e mm’appícceco cu ‘a morte
                                  pe’ campá!”
 
                                                             II
 
                Tu si’ bella e nun mme siente…
                Io só’ brutto!…E pe’ fá ‘o bello
                mme ‘mbriaco e, si mme tiente,
                t’accarezzo cu ‘o curtiello!
 
                E po’ dico: “Ccá stóngo i’…
                si pe’ st’uocchie aggi”a murí,
                si pe’ te mm’aggi’a danná,
                figlia mia, t”o ppuó’ scurdá!
 
                        Io t’accido! E nun mme ‘mporta…
                ca te voglio pure morta
                                ‘mbraccio a me!”
 
                                                             III
 
                Guappo? No! Nun sóngo guappo
                e nun stóngo fatto a vino:
                Cchiù te tremmo e mme ne scappo,
                cchiù te sento e mm’avvicino…
 
                E te dico: “Stóngo ccá…
                si pe’ te mm’aggi”a danná,
                si pe’ st’uocchie aggi”a murí,
                io só’ pronto a dí ca sí!
 
                        ‘Nnanze a te nun faccio ‘o forte
                e si vuó’, mm’abbraccio ‘a morte
                                          pe’ murí!…”