Napule é ‘na canzone

  •     NAPULE E’ ‘NA CANZONA (De Cristofaro – E.A.Mario 1922)


Se vonno purtá Napule,
          nun saccio a qua’ paese:
          Miliardarie ca fanno spese,
          se ne trovano ‘nquantitá!…
          Nu bellu juorno, tèccote,
          s’appura, ditto ‘nfatto,
          ca Pusilleco ha fatto…’o sfratto…
          E ‘o Vesuvio…va’ trova addó’ sta!
 
          Ma…pe’ s”a purtá,
          nun sanno ancora comm’hann”a fá…
          No, niente ce pò,
          pe’ spustá Napule ‘a dó’ sta mo…
          Sí, só’ migliare ‘e prugette,
          ma chi ce se mette,
          maje niente pò fá!
          E tutte ‘a vònno Napule,
          ma nisciuno s”a pò purtá…
                              II
          Chi ‘a vò’ purtá in America,
          chi ‘a vò’ purtá in Giappone…
          ma ll’Europa se fa ragione,
          dice: “E’ meglio ca resta a me!”
          E allora va in Germania?
          Va ‘n Francia o in Inghilterra?…
          Pò succedere n’ata guerra
          pe’ decidere chi ll’ha da avé…
 
                        Ma…pe’ s”a purtá,
                        …………………………
                           III
          Quanta ‘ngigniere vènono!
          Ma che prugette fanno?
          Comme vènono…se ne vanno!
          Se ne vanno, ma…pe’ turná…
          Chi ‘a vò’ tirá cu ‘o mángano,
          scastrata intera intera…
          Chi ‘a vò’ spartere cu maniera,
          piezzo, piezzo…e po’ ‘a torna a ‘ncullá!
 
          Ma…pe’ s”a purtá,
          mo ce ‘o ccunziglio comm’hann”a fá…
          No, niente ce pò,
          ma ‘o mezzo è facile pe’ chi ‘o vò’…
          Quanno na bella canzone,
          cu tutt”a passione,
          s’arriva a cantá…
          Pe’ tutt”o munno, Napule,
          dint”o core, se pò purtá…