‘Ncopp all’onna

Cchiù verde d”e ffrónne
                stasera só’ ll’onne,
                só’ ll’onne d”o mare…
                          Mme ‘ncanto e mme pare
                          ch”a varca se sperde
                          pe’ ‘mmiez’a stu vverde.
                E i’ voco, e vucanno, mme scordo…
                Mme scordo d”o munno, Marí’!…
 
                         Nonna, nonna,
                         ‘ncopp’a ll’onna,
                comm’è bello ‘int”a varca a durmí…
                         Doce è ‘o suonno
                         ca mme sonno….
                Ah, putesse, sunnanno, murí!…
 
                                                             II
 
                Sunate, campane,
                vicine e luntane
                ca ‘o mare risponne…
                                Rispónnono ll’onne
                                ch”a sanno ‘sta voce
                                ca è triste, ma è doce…
                P”a terra e p”o mare, è na pace:
                Chest’ora, mme fa ‘ntennerí!…
 
                          Nonna, nonna,
                          ……………………
 
                                                             III
 
                 Marí’, tutt”e ggioje
                 d”a vita só’ ‘e ttoje,
                 ma ‘o mare è d”o mio…
                                Ccá regno sul’io…
                                pecché, ‘o marenaro,
                                è ‘o rre, ‘mmiez’ô mare!
                 Cu st’èvera bella ch’addora,
                 mme faccio ‘a curona, Marí’!
 
                                Nonna, nonna,
                                ……………………