‘A Capemonte

Sotto a chist’arbere viecchie abballaveno
‘e cape femmene, cient’anne fa,
quanno s’ausavano ventaglie ‘avorio,
polvera ‘e cipria e falbalà.
Ce se metteveno viuline e flàvute
pe l’aria tennera a suspirà,
e zenniaveno lI’uocchie d’ ‘e ffemmene,
chine ‘e malizia, da ccà e da llà…
Ma si chest’ebbreca turnà nun pò,
nun allarmammece, pe carità!
‘E cape femmene ce stanno mo,
cchiù cape femmene de chelli llà!…
Ma si chest’ebbreca turnà nun pò,
nun allarmammece, pe carità!
‘E cape femmene ce stanno mo,
cchiù cape femmene de chelli llà

Da mmiez’a st’arbere sti statue ‘e marmolo
vonno, affacciannese, sentì cantà,
vonno sta museca passere e miérole,
scetate, sèntere, pe s’ ‘a mparà.
Dice sta museca, ncopp’a nu vàlzere;
“Figliò, spassateve ca tiempo nn’è!
Si ‘e core ‘e lI’uommene sentite sbattere,
cunzideratele, sentite a me!
L’anne ca passano chi pò acchiappà?
Chi pò trattènere la giuventù?
Si se licenzia, nun c’è che fa’,
nun torna a nascere, nun vene cchiù!”
E si risponnere, luntana e debule,
mo n’ata museca ve pararrà,
allicurdateve de chelli femmene
ca nce ballaveno cient’anne fa.
Vèneno a sèntere st’ombre ca passano
comme se spassano di gente ‘e mo:
e si suspirano vo’ di ca’ penzano
ca ‘o tiempo giovene turnà nun pò…
Figliò, spassateve, c’avimmma fa?
nun torna a nascere la gioventù…
Mme pare ‘e sèntere murmulià
ll’eco nfra st’arbere: “Nun torna cchiù!…”
Vèneno a sèntere st’ombre ca passano
comme se spassano di gente ‘e mo:
e si suspirano vo’ di ca’ penzano
ca ‘o tiempo giovene turnà nun pò…
Figliò, spassateve, c’avimmma fa?
nun torna a nascere la gioventù…
Mme pare ‘e sèntere murmulià
ll’eco nfra st’arbere: “Nun torna cchiù!…”
Figliò, spassateve, c’avimmma fa?
nun torna a nascere la gioventù…
Mme pare ‘e sèntere murmulià
ll’eco nfra st’arbere: “Nun torna cchiù!…”


Potrebbero interessarti anche...

WP Radio
WP Radio
OFFLINE LIVE