‘A sirena

  •     ‘A SIRENA (Di Giacomo – Valente 1897)

Quanno ‘a luna, affacciánnose ‘a cielo,
          passa e luce e, ‘int’a ll’acqua, se ‘mmira
          e ce stenne, d’argiento, nu velo,
          mentre ‘o viento d”a sera suspira;
                  quanno io sento, pe’ st’aria addurosa,
                  comm”a voce d”a terra luntana,
                  lenta lenta, suná na campana…
                  ‘ntenneruto, mme metto a vucá…
                          Tutte mme diceno:
                          “Pe’ sotto Pròceta,
                          si passe, scánzate,
                          ca c’è pericolo!
                                  Ce sta na femmena
                                  ca ‘ncanta ll’uommene…
                                  s”e cchiamma e, a ll’úrdemo,
                                  po’ ‘e ffa murí!”
 
                          Ah!…voca, vo’…
 
          Ma na Santa tengo io ca mme prutegge
          e mme scanza p”a via:
          Santa Lucia…Santa Lucia…
 
                                                       II
 
          Voca voca!…’a ‘i’ ccá Pròceta nera,
          sott”o cielo sereno e stellato…
          ‘a vi’ ccá, ‘mmiez’a st’aria d”a sera,
          tale e quale a nu monte affatato…
                  ‘A vi’ ccá…che silenzio, che pace!
                  Ll’ora è chesta d”a bella sirena
                  scenne, sciulia, s’abbía ‘ncopp”a rena…
                  e nu segno, cu ‘a mano, mme fa!…
                          Na voce amábbele
                          tremma pe’ ll’aria:
                          “Scánzate, scánzate!…
                          ca staje ‘npericolo…
                                  Chest’è na femmena
                                  ca, sotto Pròceta,
                                  ‘ncantáte, ll’uommene,
                                  fa rummané…”
 
                          Ah!…voca, vo’…
 
          Ma na Santa tengo io ca mme prutegge
          e mme scanza p”a via…
          Santa Lucia…Santa Lucia…

 
 
                                                      III
 
          Voca voca, ‘a sirena mm’aspetta…
          mme fa segno e, cantanno, mme dice:
          “Piscató’, vuó’ cagná ‘sta varchetta
          cu nu regno e na vita felice?”
                  Voca fore! ‘Sta voce ‘a cunosco…
                  Chi mme chiamma se chiamma Isabella…
                  Prucetana, si’ ‘nfama e si’ bella…
                  e mme stive facenno murí…
 
                          Na voce amábbele
                          tremma pe’ ll’aria…
                          Ma è tutt’inutile,
                          nun mme pò vencere!…
                                  Saccio a ‘sta femmena
                                  ca, sotto Pròceta,
                                  ‘ncantate, ll’uommene,
                                  fa rummané!…
 
                          Ah!…voca, vo’…
 
          Ma na santa tengo io ca mme prutegge
          e mme scanza p”a via:
          Santa Lucia…Santa Lucia…