Cara Lucia

Pusilleco vint’anne dint’ ‘o core
pe’ ‘na viarella ca’ scenneva a mare
io suspiranno te parlaie d’ammore
e tu tremmanno me diciste sì
cara Lucia nnamuratella mia
sì stata ‘a primmavera ‘e chesta giuventù
cara Lucia che suonno ‘e fantasia
nascette dint’ ‘o core vicino a te Lucia

E po’ ‘na sera ‘e vierno fredda e amara
a Napule partette ‘nu vapore
addio speranza addio suonne d’ammore
e addio pe’ sempe a chi nun torna cchiù
cara Lucia nnammuratella mia
sì stata ‘a primmavera ‘e chesta giuventù
cara Lucia ma quanta nustalgia
scennette dint’ ‘o core luntano ‘a te Lucia

Doppo tant’anne ce’ simme ‘ncuntrate
e nun ce simme quase canusciute
tu mo sì l’ombra triste do’ passate
e io mo so’ chillo ca’ nun spera cchiù
cara Lucia nnamuratella mia
sì stata ‘a primmavera ‘e chesta giuventù
cara Lucia mò che malincunia
me sento dint’ ‘o core penzanno a te Lucia