‘O festino


Amice! Mme scusate si ve lasso:
          ‘o vico sta ‘nfestino, e…chi capisce,
          tuorto nun mme pò dá…mme cumpatisce:
          sposa chi mm’ha vuluto bene a me…
          Jastemmo e smaledico,
          ‘sta femmena busciarda e dispettosa…
          Mm’aggio spartuto ‘o suonno cu n’amico…
          e chisto amico, mo…
          è chillo ca s”a sposa!…
 
                                                      II
 
          Parole doce…frennesia…suspire…
          e na catena ‘e vase longa assaje…
          Chisto è ll’ammore ca ce ‘ncatenaje!
          Chist’ è ll’ammore ca nun torna cchiù!…
          ‘O ssaccio, sta ‘nfestino…
          e nun lle ‘mporta ‘e me, che a stu puntone,
          faccio ‘a figura ‘e n’ommo fatto a vino…
          Invece io stóngo ccá,
          ‘mbriaco ‘e passione…
 
                                                      III
 
          Nun só’ cchiù guappo e tèccove ‘o curtiello…
          No…nun v”o voglio dá…mme serve ancora!
          Essa è spusata ‘a quanto? – ‘A n’ora! – ‘A n’ora? –
          Ma dint”o lietto nun se cuccarrá!
          D”o sposo nun mme ‘mporta…
          mo saglio comme fosse nu ‘mmitato…
          Dimane, ognuno dice: “‘A sposa è morta!
          – E’ stata accisa!… – ‘A chi? –
          Da ‘o primmo ‘nnammurato!”