Vommero e Margellina

Tu staje ‘e casa ô Vommero,
                  io stongo a Margellina…
                  tu duorme ‘mmiez’a ll’albere,
                  io ‘nterra a ‘sta marina…
                  Cu ‘e rampicante e ll’ellera
                  t’hê fatto nu lettino;
                  io tengo ‘arena morbida,
                  nu scoglio pe’ cuscino…
 
                      Spusámmoce…spusámmoce…
                      Ca si stu matrimonio,
                      ll’ammore ce cumbina…
                      te veco ‘ncopp”o Vommero
                      da vascio Margellina.
 
                                                                  II
 
                  Tu siénte comme cantano
                  ll’aucielle ‘int”e ciardine…
                  io sento da Pusilleco
                  chitarre e manduline…
                  Si allegro e malinconico
                  te guarda San Martino,
                  io sento ca ‘o Vesuvio
                  mme fa nu surdiglino…
 
                      Spusámmoce…spusámmoce…
                      Ca si stu matrimonio,
                      ll’ammore ce cumbina…
                      tu, bella, ‘a copp”o Vommero
                      mme vide a Margellina.
 
                                                                 III
 
                  Tu dice: “‘Ncopp”o Vòmmero
                  ‘o cielo è cchiù celeste…”
                  Io dico: “‘O mare ‘e Napule
                  è ‘a festa ‘e tutt”e ffeste!…”
                  E si pe’ copp’a ll’albere
                  a te cántano ‘e ffronne…
                  a me, p”o mare placido,
                  cántano ‘e vvarche e ll’onne!
 
                      Spusámmoce…spusámmoce…
                      Ca si stu matrimonio,
                      duje figlie ce cumbina…
                      nu figlio ‘o chiammo Vòmmero,
                      na figlia Margellina!