‘A ricetta ‘e Napule

Nu viecchio milionario americano,
         teneva nun se sa che malatia…
         era nefrite, tisi o pecundría?…
         ‘a scienza nun sapeva andiviná!…
         Però un amico intimo
         dicette: “Pe’ guarí ‘a ‘sta malatia,
         portiamolo in Germania:
         ce stanno prufessure ‘e chirurgia…”
         E ‘o juorno appriesso, ‘ncopp’a nu vapore,
         passaje ll’oceano ‘o povero signore…
 
                                                      II
 
         ‘E meglie scienziate berlinese
         ‘o visitajeno senza capí niente…
         però, sapenno ca ce steva “‘argiento”,
         dicettero: “Tentiamo d’operá…”
         Senza nisciunu scrupolo
         ‘tagliajeno ‘o cuorpo ‘e chillu vicchiariello…
         e, quanno fuje a ll’ùrdemo,
         campava e nun campava ‘o puveriello…
         E quase quase, tanto d”o dulore,
         steva saglienno ‘ncielo add”o Signore…
 
                                                       III
 
         Ma Napule, vedenno stu vapore
         ca se purtava ‘o viecchio quase muorto…
         dicette: “Favorite dint”o Puorto,
         tengo na cosa ca lle pò giuvá…”
         Pigliaje nu poco ‘e Vommero
         cu vinticinche gramme ‘e Margellina,
         nu pízzeco ‘e Pusilleco
         e ‘o preparaje na bella mmedecina.
         E ‘o viecchio, nun appena s”a pigliaje,
         dint’a nu quarto d’ora se sanaje…
 
         Finale:
 
         Chest’è ‘a ricetta ‘e Napule:
         nu poco ‘e sole vi’ che te cumbina…
         pure chi è muorto ‘e sùbbeto
         venenno ccá, risuscita e cammina…
         Nun ce vò’ menta cedra e fronn”aruta
         pe’ stá sempe benissimo in salute!….