‘A serenata d”e rrose
E’ mezanotte, e cu stu mandulino,
i’ canto a stu barcone chino ‘e rose…
saglie n’addore ‘arancio da ‘o ciardino
e st’aria doce vène a prufumá!
‘A luna janca mme pare d’argiento,
sbattute sóngo ‘e rrose da stu viento…
Oje rose meje!
Si dorme chesta fata,
scetátela cu chesta serenata!
II
E’ mezanotte, e i’ canto ‘sta canzone
cu ‘e sciure e cu ll’aucielle ‘ncumpagnía…
Quanta suspire e quanta passione,
dint’a stu core mio, tengo pe’ te…
Suspire mieje, vulate a stu barcone:
Facite sentí a Rosa ‘sta canzone…
Oje rose meje!
……………………
III
Oje luna, pecché ride e tiene mente?
Pecché mo nun faje luce a stu barcone?
Cu chisti ragge tuoje tanto lucente,
famme vedé si Rosa, mo, nce sta…
Vola canzone mia, vola, canzone!…
Rusina mme fa ‘a spia for”o barcone…
Oje rose meje!
Essa, mo, s’è scetata:
Purtàtele, pe’ me, ‘sta serenata.
