‘O principe indiano

E’ arrivato nu principe indiano,
                va cercanno a na bella guagliona:
                vò’ na sposa…giá è pronta ‘a curona
                pe’ ‘sta figlia ‘e ‘sta rara cittá…
                E pe’ Napule, sera e matina,
                isso, a pède, s’è miso a girá…
                quanno ha visto p”a strada a Nannina:
                “Chesta – ha ditto – ‘a riggina sarrá!”
 
                                Ma però,
                          Nannina nun ‘o vò’…
                                Ma però,
                          Nannina nun ‘o vò’…
 
                E a stu princepe essa ha ditto:
                “Ve ringrazio dell’onore,
                voglio bene a Salvatore…
                nun ‘o cagno cu nu rre!
                        Io sóngo nata a Napule
                        ch’è ‘a perla d”e ccittá:
                        pe’ me nun ce sta princepe
                        capace ‘e mme ‘ncantá!…”
 
                                                             II
 
                “Tène ‘a reggia ch’è d’oro e brillante,
                chistu princepe”, diceno ‘e ggente…
                E ‘a cchiù bella cullana d’Uriente,
                giá ‘sta nénna s’è visto ‘e purtá.
                Ma cu ll’aria ‘e na vera riggina,
                ca cchiù niente pò farla abbagliá…
                “Ve ringrazio – ha risposto Nannina –
                chistu dono nun pòzzo accettá!”
 
                                Ma però,
                          Nannina nun ‘o vò’
                                  ……..
 
                Mo, stu princepe straniero,
                se ne torna â parte ‘e fore…
                e ha capito ca ll’ammore
                nun se vénne a ‘sta cittá…
                        Pecché ‘a figliola ‘e Napule,
                        nun è pe’ ce vantá,
                        è ‘a cchiù sincera fémmena
                        ca ‘ncopp”o munno sta!…