‘O rammariello


Jéva vennenno casa pe’ casa…
         ‘o sapevano ‘a guagliunciello:
         ‘o chiammavano ‘o rammariello…
         E deva ‘a voce: “Chi vò’ fá spese!?…”
         E accattavano ‘e ffigliulelle
         ca s’avevan”a mmaretá…
 
                – Véngo cuperte ‘e raso
                 p”o lietto ‘e sposa…
                 Pavate a tanto ‘o mese,
                          facite spese! –
 
         Deva ‘a voce stu rammariello
         ca penzava sulo a cantá…
         Era ancora giuvinuttiello:
         chella fine nun ll’êv”a fá!
 
                                                       II
 
         E capitaje ‘ncopp’a na casa…
         llá ce steva na figliulella
         ch’era ‘o sole tant’era bella…
         Isso dicette: “Si vuó’ fá spese,
         ccá sta ‘o core d”o rammariello…
         teccatillo…t”o puó’ pigliá!”
 
                – Tengo ‘a cuperta ‘e raso
                 p”o lietto ‘e sposa…
                 Mme piglio a tanto ‘o mese…
                          na bella casa…-
 
         Dint”o core d”o rammariello
         giá cantava ‘a felicitá
         giá vedeva ‘sta nénna bella,
         dint”a cchiesa, pe’ ghí a spusá!…
 
                                                       III
 
         Ma va’ sapenno, ‘sta nénna bella,
         ca dint’a ll’uocchie teneva ‘o cielo
         e teneva na vocca ‘e mèle…
         s’era scurdata ‘e nu ‘nnammurato
         ca, dint”o core teneva ‘o ffèle,
         e giurava ‘e se vendicá!
 
                – Véngo cuperte ‘e raso
                 p”o lietto ‘e sposa… –
                 S’arretirava â casa
                          ‘mbriaco ‘e vase…

 
 
 
         E cantava stu rammariello,
         nun puteva maje ‘mmagginá
         ca ‘o curtiello d”a marennella
         lle serveva pe’ se salvá!
 
         Finale:
 
                …………………………
 
                – Véngo cuperte ‘e raso
                 p”o lietto ‘e sposa… –
                 Mo cchiù nun ll’hanno ‘ntiso
                          casa pe’ casa…
 
         Chistu povero rammariello
         ca penzava sulo a cantá,
         mo sta ‘nchiuso dint”e ccancelle…
         chella fine nun ll’êv”a fá!