Luna nova

  •     LUNA NOVA (M. Costa – S. Di Giacomo 1887)



La luna nova, ‘ncopp’a lu mare,
                 stènne na fascia d’argiento fino…
                 Dint’a la varca, lu marenaro,
                 quase s’addorme cu ‘a rezza ‘nzino…
 
                 Nun durmí, scétate, oje marená’,
                 vótta ‘sta rezza, penza a vucá!…
 
                         Nun durmí, scétate, oje marená’,
                         vótta ‘sta rezza, penza a vucá!…
 
                                                            II
 
                 Dorme e suspira stu marenaro,
                 se sta sunnanno la ‘nnammurata…
                 Zitto e cujeto se sta lu mare,
                 pure la luna se nc’è ‘ncantata…
 
                 Luna d’argiento, lass”o sunná,
                 vásalo ‘nfronte…nun ‘o scetá!…
 
                         Luna d’argiento, lass”o sunná,
                         vásalo ‘nfronte…nun ‘o scetá!…
 
                                                             III
 
                 Comm’a nu suonno de marenare,
                 tu duorme, Napule, viata a te…
                 Duorme ma, ‘nzuonno, lacreme amare,
                 tu chiagne Napule, scétate scé’!
 
                 Puózze na vota resuscitá!…
                 Scétate scé’, Napule Na’!…
 
                         Puózze na vota resuscitá!…
                         Scétate scé’, Napule Na’!…